Эрх чөлөөний хөшөөг Франц улсад буцааж өгөх тухай Европын парламентын гишүүн Рафаэль Глюксманны уриалгад Цагаан ордон татгалзсан хариу өгчээ. Францын улстөрч үүнийгээ тайлбарлахдаа "АНУ ардчиллаас ухарч, дарангуйлагчдын талд" орсон хэмээн мэдэгдсэн байна.

АНУ-ын Ерөнхийлөгч Дональд Трамп хөшөөг Францад буцааж өгөх эсэхийг асуухад Цагаан ордны хэвлэлийн нарийн бичгийн дарга Каролин Левитт “Үгүй” гэж хариулжээ. "Францын доод түвшний улстөрчдөд өгөх миний зөвлөгөө бол  Америкийн Нэгдсэн Улсын ачаар францчууд одоо герман хэлээр ярихгүй байгаа гэдгийг тэдэнд сануулах явдал юм" гэж тэрбээр хэвлэлийн бага хурлын үеэр хэлэв. 

Францын уран барималч Огюст Бартолдигийн бүтээсэн хөшөөг 1885 оны зургаадугаар сард АНУ-д хүргэсэн бөгөөд 1886 оны 10 дугаар сарын 28-нд болсон нээлтийн ёслолд Америкийн Ерөнхийлөгч Гровер Кливленд оролцжээ. 1984 онд ЮНЕСКО-гийн Дэлхийн өвийн жагсаалтад орсон энэ хөшөө одоо Манхэттэн арлаас 3 орчим км-ийн зайд, Нью-Йоркийн дээд тохой дахь Эрх чөлөөний арал дээр сүндэрлэдэг.



 

Эх сурвалж: "Монцамэ" агентлаг