Хан-Уул дүүргийн дөрөвдүгээр хорооны нутаг дэвсгэр, уулын энгэрт арваад жил амьдарч байгаа Л.Рэнцэндоржийг 2021, 2025 онд тус тус тухайн хорооны Хөдөлмөр халамжийн хэлтэс болон бусад холбогдох газраас хамтарсан баг ажиллаж, нийгэмшүүлэх арга хэмжээ авсан. Тодруулбал, эхний удаад гэр авч өгч дүүгийнх нь хашаанд төвхнүүлсэн бол дараа нь "Өлзийт-Асар" түр хоноглох байрт хүргэсэн. Гэвч тэрбээр дахин ууландаа эргэж иржээ. Нийгмийн сүлжээнд нэгэн иргэн түүнийг цагаан сарын өдрүүдээр ууланд таарч, үүнээс хойш эргэж очиж байгаа тухайгаа бичлэгээр оруулжээ. 

Тэрбээр цагаан сараар бууз идсэн үү гэж асуухад "хогон дээрээс олж идсэн" хэмээн хариулсан байна. Бусдаас тусламж авахыг хүсдэггүй гэж ярьдаг энэ хүн тус хорооны хогийн цэгээс хоол, хувцас бусад эд зүйлсээ олж амьдардаг бөгөөд хэвтэхгүйгээр сууж унтсаар сурсан хэмээн ярьж байсан билээ.