"Цахим орчин дах хүүхэд хамгаалал" сэдэвт сургалтыг Нийслэлийн Хүүхэд, гэр бүлийн хөгжил хамгааллын газар болон Харилцаа холбооны зохицуулах хороо, Кибер гэмт хэрэгтэй тэмцэх газар хамтран зохион байгууллаа.

Энэ үеэр "Нийслэлийн Хүүхэд, гэр бүлийн хөгжил, хамгааллын газар"-ын хэлтсийн дарга Х.Оюунтуяа дараах мэдээллийг өгснийг онцолж байна. 

"Хүүхдүүд цахим орчинд асуудалд өртсөнөө эцэг эх асран хамгаалагчдаа хэлэхээс айдаг, нэр төрд сөрөг байдал үүсэхээс болж гэмт хэргийн золиос болох нь нийтлэг байна. Эцэг эхчүүд хүүхдээ сонсохгүй, буруутгах хандлага их. Хүүхдийг хэнтэй, юуны өмнө цагаа өнгөрөөж байна вэ гэдэгт эцэх эхчүүд хариуцлагатай байхаас гадна ярилцдаг байх ёстой. Гэр бүлийн гишүүд өөр хоорондоо тохиолдсон асуудал бэрхшээл, жаргал зовлон ярилцдаг гэр бүлийн цагтай байгаасай. 0-2 насны хүүхэд дэлгэцийн хэрэглээ байхгүй, 2-3 насанд 15 минут хэрэглэх ёстой гэх мэт цаг хугацаагаар заагаад өгсөн байдаг. Мөн насны хязгаарт тохирсон контентыг үзүүлэх хэрэгтэй. Хориотой агуулга контентыг үзүүлэхгүй байх, контентын насны тэмдэглэгээг маш сайн анзаардаг байгаарай. Хориотой контент руу ороход арга хэмжээ авдаг техникийн боломжуудыг ашиглаарай. Хүүхдийн эрхийн зөрчлийн тоо, цахим орчин дахь дарамт дээрэлхэлт болон гэмт хэргийн тоо нэмэгдсэн. Жишээлбэл 2023 онд 600 орчим гэмт хэрэг гарсан байна. Хүүхэд хамгааллын тухай хуулийн шинэчилсэн найруулга 2024 оны есдүгээр сарын 1-нээс хэрэгжиж эхэлсэн. Шинэчилсэн найруулгаар үе тэнгийн дээрэлхэлтийг хуульчилсан. Жишээ нь, үе тэнгийн дээрэлхэлтэд өртсөн болон өртүүлсэн хүүхдүүдийг эцэг эх асран хамгаалагчийн хамтаар сургалтад хамруулж, 16 наснаас доош хүүхэд цахим орчинд хүүхдэд бусдадаа хор хөнөөлтэй нөхцөл байдал үүсгэсэн тохиолдолд эцэг эх асран хамгаалагчид хариуцлага хүлээнэ. Мөн эцэг эх асран хамгаалагчид хүүхдийнхээ нэр төрд халдсан хувийн мэдээллийг цахим орчинд нийтэлсэн түгээсэн үүнтэй холбоотойгоор хүүхдэд эрсдэл үүссэн тохиолдолд Зөрчлийн тухай хуулийн 6.20 дагуу эцэг эх асран хамгаалагчид 500 нэгжтэй тэнцэх төгрөгөөр, ААН байгууллага 5000 нэгжтэй тэнцэх хэмжээний торгуулна.