“Говийн Лха” тахилга хурлыг монгол хэлээр хурна.

МБШТ- Гандантэгчэнлин хийдийн тэргүүн их хамба, 30 дахь хамба номун хан, гэвш лхаарамба Д.Жавзандорж ламын зарлигийн дагуу Жанрайсиг дацангийн лам хуврагууд “Говийн Лха” тахилга хурлыг монгол хэлээр уншин хурах гэж байна. Тодруулбал, төв гандангийн Жанрайсиг дацанд гуравдугаар сарын 15-ны өдөр 12:00 цагт эхлэх бөгөөд сүсэгтэн олныг номын үйлд даган баясаж, оролцохыг урьжээ. 

Говийн Лха нь аливаа хүн төрөхөд хамт төрж, тэр хүнийг насан турш даган тэтгэж, амьдрал, ажил үйлс, нас буян, аз жаргалыг тэгшитгэн дэмжиж байдаг учиртай. Лха таван тэнгэрт Мо лха буюу Охин тэнгэр, Срог лха буюу Амин тэнгэр, По лха буюу эрийн тэнгэр, Ю лха буюу Орон гэрийн тэнгэр, Да лха буюу Дайчин тэнгэр хамаарна. Монгол айл бүр гэрийн хоймортоо залдаг шүтээн бурхан бөгөөд ялангуяа эхнэр нөхрийн заяа тэгш гэр бүлийг эрийн тэнгэртэй, эмийн заяатай гэр хэмээн хэлэлцэнэ. Сүм хийдэд байдаг шиг томоор хөрөглөдөггүй байна. Хүүхэд төрөх мөчид тухайн хүүхдийн буян заяаг тэгшлэх “Таван тэнгэр” хамт төрдөг хэмээн эртнээс нааш шүтэж иржээ.