Малчин иргэн цогтой үнсээ асгаснаас үүдэлтэй гэх түймэр Хэнтийн Баян-Овоогоос эхэлж олон га талбай газар, мал, хашаа саравч, гэр, автомашин, мотоцикл өртлөө. Иргэний санамсар болгоомжгүй байдлаас үүссэн гал түймэр их хэмжээний хор хохирлыг бусдад учруулахад хуулиараа ямар хариуцлага хүлээх талаарх мэдээллийг нийтэлж байна. Одоогоор мэргэжлийн байгууллагууд түймрийн голомтод хор хохирлыг эцэслэн тогтоохоор ажиллаж байна. 

Эрүүгийн хуулийн 24.7 дугаар зүйлийн 1-д "Гал, шатамхай зүйлтэй болгоомжгүй харьцсаны улмаас ой, хээрийн түймэр гарч хүний бие махбодид хүнд хохирол учирсан, хүний амь нас хохирсон; их хэмжээний хохирол учирсан бол нэг жилээс таван жил хүртэл хугацаагаар хорих ял шийтгэнэ" гэж заасан бөгөөд их хэмжээний хохирол гэж 50.000.000 төгрөг, түүнээс дээш хэмжээг ойлгоно.

Иймд Ойн тухай хууль болон Ой хээрийн түймрээс учирсан хохирлыг тооцох журамд заасны дагуу учирсан хохирлыг тооцон их хэмжээний хохирол учирсан тохиолдолд тухайн "цогтой үнсээ асгасан" гэх иргэнд холбогдуулан хариуцлага оногдуулахаар байна. Харин их хэмжээний хохирол учраагүй тохиолдолд Зөрчлийн тухай хуулийн 7.9 дүгээр зүйлийн 10-д "Ойн тухай хуулиар тогтоосон шаардлагыг биелүүлээгүй бол учруулсан хохирол нөхөн төлбөрийг гаргуулж хүнийг тавин нэгжтэй тэнцэх хэмжээний төгрөгөөр, хуулийн этгээдийг таван зуун нэгжтэй тэнцэх хэмжээний төгрөгөөр торгоно" гэж заасан бөгөөд Ойн тухай хуулийн 20 дугаар зүйлийн 20.2-т заасан иргэний ойг хамгаалах талаар үүрэг болох 20.2.6-д заасан "өрх бүр үнс, нурмыг тусгайлан бэлдсэн таглаа бүхий нүх, саванд хийж, түймэр алдахгүй байх нөхцөлийг хангах" гэж заасан үүргээ биелүүлээгүй гэж үзэх боломжтой байх тул Зөрчлийн тухай хуульд заасан хариуцлага хүлээлгэн, хохирлыг арилгуулахаар байна.