Гандантэгчэнлин хийдийн тэргүүн их хамба лам Д.Жавзандорж насны авшиг хайрлана. 

Тодруулбал, МБШТ– Гандантэгчэнлин хийдийн тэргүүн их хамба лам, 30 дахь хамба номун хан, гэвш лхаарамба Д.Жавзандорж гуравдугаар сарын 8-ны өдөр буюу хаврын тэргүүн сарын шинийн 9-ний билэгт сайн өдөр Батцагаан цогчэн дуганд сүсэгтэн олондоо зориулан “Насны авшиг” хайрлах гэж байна. Насны авшиг нь амьдралын урт удаан буян хишигтэй байхыг бэлгэдэн, эрүүл саруул, өлзий хутгийг дээдлэхийн төлөө сахил санваар хүртэх авшиг юм.

Насны авшиг нь Цагаан Дарь-Эх бурханы адистэд авралыг дамжуулан өгч буй өөрийн үүсгэл, өмнийн үүсгэл, залбирал, тахил өргөхүй, ерөөл сэлт лугаа зан үйл юм. Дарь-Эх бурхан нь 10 зүгийн 3 цагийн бурхан бүгдийн айлдал, энэрэл хүч чадал, үйлсийн хураангуйн мөн чанартай. Цагаан Дарь-Эх бурхан Агиванчигдагвад насны авшигийн увидас үүнийг хайрлажээ. Энэхүү увидас Энэтхэг, Төвд, Монгол бүтээлч мэргэдээр дамжин уламжлагдаж ирсэн түүхтэй. Цагаан Дарь-Эх бурханы авшгийг авсанаар түүний аврал өршөөлд багтан адистэд нь оршиж, насны элдэв саад зэтгэр арилж, урт удаан наслахын шидийг хайрладаг юм. Насны авшигийг хүртсэн хэн боловч Цагаан Дарь-Эх бурханы мөргөл, тарни, ерөөлийг урьж өгүүлэхийг хичээгтүн.
Мөргөл нь:
Алин таны өлмийн лянхуаг бишрэн тахисанаар
Авралт Дарь эх тэргүүтэн арвис тарнийг өгүүлсэн төдийд
Аюулт үхэл үгүй, нас билиг билгүүн, буян сэлт
Аливаа хүссэн шидийг хайрлагч дор мөргөмүй.
Тарни нь: УМ ДАРИ ДҮД ДАРИ ДҮРИ МАМА АЮУР БУНЪЯ ЗИНА БҮСДЭМ ГҮРҮ СУУХА
Залбирал бясалгал нь: Дарь-Эх бурханы лагшингаас гарсан рашаан өөрийн болоод бусад бүх амьтны оройд шингээд бүхий биеийг дүүргэснээр өвчин хилэнц, нүгэл хэдий чинээ байсан төдий чинээ арилж бүхий биеэ олон давхар рашааны давхрагаар дүүргэн, амгалангаар цэнгэж байна гэж бодох нь магад утга юм.