Могой жилийн цагаан сар нь шинийн 1-ний өдөр тасарсан, шинийн 2, 3-ны өдөр бямба, ням гараг таарсан тул гуравдугаар сарын 3-ны даваа гарагаас ажлын өдөр эхлэхээр шийдвэрлэсэн байсан. Гэвч иргэд Засгийн газрын 11-11 дугаарт гомдол санал гаргаснаас уг шийдвэрийг эргэн харж, өөрчлөлт хийхэд хүрсэн. Улмаар 2025 оны хоёрдугаар сарын 27-ны өдрийн Засгийн газрын тогтоолоор сар шинийн баярын амралтыг сунгаж, гуравдугаар сарын 3, 4, 5-ны өдөр амрахаар болсон. 

Гэнэтийн энэ шийдвэртэй иргэдэд бас нэг асуудал тулгамдсан нь улсын эмнэлгүүдэд гуравдугаар сарын 3, 4, 5-ны өдрүүдэд үзлэг, оношилгооны цаг урьдчилж авснаа хэрхэх тухай юм. Энэ талаар Эрүүл Мэндийн Яамнаас тодруулахад "Эдгээр өдрүүдэд эмнэлэгт үйлчилгээ авахаар цаг авсан иргэдийн асуудлыг тухайн эмнэлгүүд дотооддоо зохицуулалт хийж ажиллана" гэлээ. Тэгэхээр иргэд та бүхэн гуравдугаар сарын 3, 4, 5-ны өдрүүдэд улсын эмнэлэгт үзүүлэхээр цаг захиалсан бол тухайн эмнэлэгтэйгээ холбогдож, цагийн зохицуулалт хийлгэх юм байна.