Говийн бүсийн аймгуудаас анх удаа Өмнөговь аймаг "Итгэл дүүрэн амьдрал төв"-ийг нээж, үйл ажиллагаа нь жигдэрчээ. Архинд донтсон хүмүүсийн 70% нь гарах хүсэлтэй байдаг бөгөөд тэдгээр хүмүүст очих газар, хандах эмч, ойлгох сэтгэл засалч, хэрэгтэй эм тариа, эмчилгээ, зорилго, итгэл хэрэгтэй. Тиймээс архинд донтох эмгэг, сэтгэцийн хүнд асуудлыг нь эмчилж дахин амьдрах итгэл хайрласнаар тухайн хүн, тэдгээрийн гэр бүлийн хувьд гэрэл гэгээ, амар тайван амьдралыг бүтээх боломжийг олгож байгаа гэсэн үг. Нас баралт, гэмт хэрэг зөрчлийн тодорхой хувь нь архинаас хамааралтай гарч байгаа тул айл гэрийн бүрэн бүтэн амьдрал, амь насыг нь хамгаалах, туслах үүднээс энэхүү төвийг нээхээр зорьжээ. Тус төв нээгдсэнээс хойш маш олон хүн өдрөөр болон хэвтэн эмчлүүлж, харин эмчлүүлсэн хүмүүс итгэл алдаад дахиж ирсэн тохиолдол гараагүй байгаад эмч ажилчид бахархан ярьжээ.