Монгол Улсын Засгийн газар “Сенчири IV” төслийн хүрээнд 6.625 хувийн хүүтэй, таван жилийн хугацаатай 500 сая ам.долларын бонд гаргаж, олон улсын санхүүгийн зах зээлд арилжаалж эхэллээ.

Шинээр гаргасан бондыг худалдан авах анхдагч захиалга арилжаалах хэмжээнээс 8.2 дахин нэмэгдсэнээр 4.1 тэрбум ам.долларт хүрэв. Үүнтэй холбоотой манай улсын бондын эрсдэл 2.27 хувь хүртэл буурч, бондын хүүг хоёрдогч зах зээлийн хүүгээс доогуур тогтоох боломж бүрдсэн байгаа юм.

Түүнчлэн “Сенчири IV” бондыг арилжаалж, ирэх онд төлөх Номад, Сенчири-2 бондоос буцаан худалдан авах байдлаар өрийн зохицуулалт хийсэн аж. Ингэж өрийн тогтвортой байдлыг сайжруулснаар “Номад” бондын үлдэгдэл төлбөрийг төсөв, эдийн засагт дарамтгүйгээр төлөх боломжтой болов. Энэ нь гадаад өрийн хэмжээг бууруулж, улсын зээлжих зэрэглэлийг дахин ахиулах, улмаар макро эдийн засгийн тогтвортой байдлыг хангахад чухал алхам болсныг Сангийн яамнаас мэдээллээ.

Шинэ бондыг арилжаалах үеэр манай улсаас өндөр зээлжих зэрэглэлтэй Узбекистан, Бразил, Доминикан зэрэг улс бонд гаргасан ч манай улс 0.1-0.4 нэгж хувиар бага хүүтэй бонд гаргалаа. Ингэснээр дотоодын аж ахуйн нэгжүүд олон улсын санхүүгийн зах зээлээс хямд өртөгтэй санхүүгийн эх үүсвэр татах боломж нээгдэж байна.