Д.Трампын засаг захиргаа Америкийн нэг иргэнийг өөр хоёр хоригдлын хамт Беларусийн шоронгоос суллаж чадлаа гэж Литва улсад суугаа АНУ-ын Элчин сайд Кара Макдональд CNN телевизийн нэвтрүүлэгт оролцохдоо мэдэгджээ.

Тэрбээр суллагдсан иргэдийн нэрийг дурдаагүй бөгөөд суллагдсан хүмүүсийг "барьцааны хүмүүс", тэднийг суллуулж чадсаныг "маш том амжилт" хэмээн онцолсон байна. Мөн АНУ-ын Төрийн департаментын Зүүн Европыг хариуцсан дипломатч Крис Смитийн ярьснаар, суллагдсан хоригдлуудыг Литвад хүргэсэн байна. "Бүх америкчуудыг суллах хүртэл бид ажлаа үргэлжлүүлнэ" гэж тэрбээр хэлжээ. 

Мөн Цагаан ордны хэвлэлийн төлөөлөгч Кэролайн Левитт хэлэхдээ "Америкийн нэг иргэн, өөр хоёр хүнийг Беларусийн шоронгоос сулласан гэдгийг АНУ-ын засаг захиргаа баталж чадна" гэлээ. Тэрбээр Макдональдын адилаар суллагдсан хүмүүсийн нэрийг дурдаагүй байна. Харин "Эрх чөлөө" радиогоор мэдээлснээр, Америкийн иргэний хамтаар тус радиогийн Беларус дахь салбарын сэтгүүлч Андрей Кузнечик, мөн Елена Мовшук гэдэг олон хүүхэдтэй эмэгтэйг суллажээ. 

Тэднийг сулласан нь Беларусийн Ерөнхийлөгч Александр Лукашенко энэ оны нэгдүгээр сард болсон маргаан дагуулсан ерөнхийлөгчийн сонгуулийн дараа АНУ-ын Ерөнхийлөгч Д.Трампын таалалд нийцэх гэж оролдож буйтай холбоотой байж магадгүй гэж CNN дүгнэсэн байна. 




 

Эх сурвалж: "Монцамэ" агентлаг