Японы тамирчин Харүки Ямашита өнөөдөр гүйлтийн цанын 10 км-ийн чөлөөт уралдаанд түрүүлснээр Харбины Азийн өвлийн наадмaac гүйлтийн цанын төрлөөр анхны алтан медалийг эх орондоо авчирлаа.   

Тэмцээнд нийт 46 цаначин өрсөлджээ. Хятадын ахмад тамирчин Ван Цян эхний 6 км-т түрүүлж байсан боловч Х.Ямашита уралдааны төгсгөл хэсэгт хошуучилж эхэлсэн байна. Өдгөө 25 настай тэрбээр 21 минут 6.5 секундэд барианд орсноор алтан медаль хүртжээ.

“Уралдааны зам дуусах дөхөх үед хурдаа нэмэх нь ялалтад хүрэх тактик. Би энэ стратегийг төлөвлөснийхөө дагуу хийж чадсан. Үр дүн нь гайхалтай байлаа. Тамирчдад хурд хүчээ сорих ийм гайхалтай орчин нөхцөлийг бүрдүүлсэн Хятад улсад талархаж байна” гэж Х.Ямашита ярилаа. Тэрбээр мөн буухиа тэмцээнд оролцож, дахин алтан медаль авахыг эрмэлзэж байгаа ажээ.

Японы цаначин Такацүгү Үдагийн хувьд Х.Ямашитагаас 10 секундээр хоцорч мөнгөн медаль хүртсэн бол Казахстаны Олжас Климин 21 минут 20.3 секундийн амжилтаар хүрэл медалийн эзэн боллоо. Харин Хятадын Бао Лин, Ван нар дөрөв, тавдугаар байрт тус тус шалгарав.

Гүйлтийн цанын тэмцээн лхагва гарагт эмэгтэйчүүдийн 4х5 км, эрэгтэй 4х7.5 км-ийн буухиа уралдаанаар өндөрлөнө.



Эх сурвалж: "Монцамэ" агентлаг