Цагдаагийн Ерөнхий Газрын Урьдчилан сэргийлэх албаны сэтгүүлч редактор, цагдаагийн ахлах дэслэгч Б.Уранцацрал дараах сэрэмжлүүлэг мэдээллийг хүргэж байна.

Энэ оны 2-р сарын 1-ний өдөр иргэн М-ээс ХУД-ийн нутаг дэвсгэрт байрлах орон сууцны гадаа таксины жолооч миний данснаас 25 сая төгрөг шилжүүлж авсан байна гэх гомдол мэдээлэл цагдаагийн байгууллагад бүртгэгджээ.

Энэхүү гомдол мэдээллийн дагуу шалгалтын ажиллагаа явуулахад марк улсын дугаар тодорхойгүй таксины жолооч үйлчлүүлж байсан 45 настай эрэгтэй М-ийн гар утсыг булаан авч Хаан банк болон ХХБ-ны данснаас нь 25 сая төгрөг шилжүүлэн авсан хэргийг ХУД-ийн цагдаагийн 2-р хэлтэс үргэлжлүүлэн шалгаж байна.

Иймд иргэд та бүхэн цахим хаяг, дансны үлдэгдэл гар утас болон интернэт банкны код зэрэг хувийн мэдээллээ бусдад харуулахгүй байх, баталгаат такси үйлчилгээгээр зорчиж, өөрийн аюулгүй байдлаа хангахыг цагдаагийн байгууллагаас анхааруулж байна.

Нийтэлсэн: Цагдаагийн Ерөнхий Газрын Хэвлэл, Мэдээллийн Төв