БНХАУ-ын Харбин хотод “Харбин-2025” Азийн өвлийн спортын IX наадам өнөөдөр албан ёсоор эхэлж байна. Энэ удаагийн наадамд 34 орны 1275 тамирчин 11 спортын 64 төрөлд өрсөлдөж байгаа бол манай улсаас дөрвөн спортын долоон төрөлд 28 дасгалжуулагчийн удирдлага дор 35 тамирчин өрсөлдөж байна. 

Харин тус наадмыг сүүлийн хоёр хоногийн хугацаанд 29 орны 418 хэвлэл мэдээллийн ажилтан мэдээ, сурвалжлага бэлтгэж байгаа бол манай улсаас хэвлэл мэдээллийн 20 сэтгүүлч, зураглаачид “Харбин-2025”-ын тухай мэдээ, мэдээллийг газар дээрээс нь цаг алдалгүй хүргэж байгаа нь сайшаалтай.

Тухайлбал, Монголын спортын сэтгүүлчдийн холбооны 10, “Тэнгэр” телевизийн долоо, “МGL Sport” сайтын гурван уран бүтээлч өвлийн спортын торгон агшинаар спорт сонирхогчдынхоо мэлмий, сонорыг мялааж буй нь Азийн өвлийн спортын өмнө найман наадмын түүхэнд гараагүй олон монгол сэтгүүлч, гэрэл зурагчин мэдээ, сурвалжлага бэлтгэж байгаа үйл явдал болов. 

“Харбин-2025” Азийн өвлийн спортын наадмыг сурвалжилж буй гэрэл зурагчдаас онцолбол, өвөл, зуны зургаан олимп, өвөл зуны Азийн таван наадмыг сурвалжилсан, соёлын гавьяат зүтгэлтэн Ч.Ганбат, Монголын спортын сэтгүүлчдийн холбооны ерөнхийлөгч асан Ч.Отгонбаатар, спортын холбогдолтой гэрэл зургийг 50 дахь жилдээ авч буй нэрт гэрэл зурагчин С.Энхжаргал, өвөл зуны гурван олимп, Азийн наадмыг гурав дахь удаагаа сурвалжилсан, “Харбин-2025” Азийн өвлийн спортын наадмын Монголын хэвлэл мэдээллийн багийн ахлагч, гэрэл зурагчин Д.Нямбилэг, зуны паралимп, Азийн зуны паралимп болон Монголын спортын гал гарсан өрсөлдөөнийг дуран авиадаа олон жил мөнхөлсөн гэрэл зурагчин Ж.Адилбиш тэргүүтэй уран бүтээлчид ажиллаж байна.