Монголын Үндэсний морин уралдаан, Уяачдын холбооноос Хаврын уралдааны талаар өнөөдөр /2025.02.03/ мэдээлэл хийлээ.

“Монголын үндэсний морин уралдаан, уяачдын холбоо”-ны нарийн бичгийн дарга М.Ариунболд “Хурдан морь уяачдын холбооны хоёрдугаар их хурал энэ оны хоёрдугаар сарын 17-нд Төрийн ордонд зохион байгуулагдана. Хуралдааны гол зорилго нь хурдан морины уралдаанд монгол адуу уралдуулах чиглэлээр явуулна. Сүүлийн хэдэн жил Үндэсний их баяр наадамд нэг ч монгол адуу айрагдаж, түрүүлээгүй. Парламентаас баталсан хууль тогтоомжийн биелэлтийг Засгийн газар, шадар сайд хангуулах ёстой. Гэтэл үндэсний их баяр наадмын тухай хуульд монгол адууны удмын санг хамгаалах цогц төлөвлөгөөг Засгийн газар баталж хэрэгжүүлнэ гээд тодорхой заасан байдаг ч энэ ажлыг хийхгүй байна.

Үндэсний баяр наадмын тухай хуулийг 2022 онд шинэчлэн батлахад уралдаанч хүүхдийн эрхийн асуудлыг маш тодорхой зааж өгсөн. 2018 оноос унаач хүүхдийг бүртгэлжүүлэх ажил эхэлсэн байдаг. “Монголоороо байя” гэсэн морьтой жагсаалд манай холбооныхон оролцоогүй. Эрлийз адуу, монгол адуу хоёрыг унаж уралдах нь унаач хүүхдэд эрсдэлтэй. Монгол морь нь замын бартаа саадыг мэдэрдэг учраас эрсдэл бага байдаг. Харин эрлийз адуу нь тэгш зам дээр уралддаг учраас янз бүрийн бартаа саадыг мэдэрдэггүй. Гарааны хурд өндөр байдаг учир унаач хүүхдэд илүү эрсдэлтэй. Иймд эрлийз адууг уралдуулахгүй байх хэрэгтэй" гэлээ. 

ХуваалцахЖиргэх