Монгол түмний гал голомтыг бадраан, хуримын ёслолын үйл ажиллагаа эрхлэх үндсэн зорилготой Гэрлэх ёслолын ордны захирлаар Нийслэлийн Иргэдийн төлөөлөгчдийн хурлын төлөөлөгч, НИТХ-ын Хүний хөгжлийн хорооны дарга Үнэнбатын Оюунзулыг томилжээ.

Үнэнбатын Оюунзул нь 2010 онд намын дэргэдэх залуучуудын байгууллагын зохицуулагчаас СДМЭХ-ны генсек, цаашлаад удирдах зөвлөлийн гишүүн, СДМЗХ-ны дэд ерөнхийлөгч хүртэл дэвшсэн, Нийслэлийн иргэдийн төлөөлөгчдийн хурлын төлөөлөгчөөр хоёр удаа сонгогдсон улс төрийн арвин туршлагатай нэгэн. Улс төр судлаач, нийгмийн ухааны багш мэргэжлээр Монгол Улсын их сургуулийг, Төрийн удирдлагын менежментээр “Рояал академи” Олон улсын их сургуулийг дүүргэсэн. Одоо Дотоод хэргийн Их сургуулийн докторант. Англи, Орос хэлтэй. 

“Үндэсний цэцэрлэгт хүрээлэн”-г тун чиг чамбай удирдаж, үндсэн чиг үүргийг нь олон нийтэд бүрэн ойлгуулж чадсан түүнийг удирдах арга барил сайтай, чадварлаг удирдагч гэдгийг нь  хамтран ажиллагсад болоод эргэн тойрныхон нь үнэлдэг юм билээ. Энэ ч утгаараа энэхүү томилгоог оновчтой болж, хагас зуун жилийн түүхтэй “Гэрлэх ёслолын ордон”-г менежмент сайтай, зөв хүндээ өглөө хэмээн харж байна.

Тэртээ 1976 онд тэргүүн хадагтай А.И.Цэдэнбал Филатовагийн санаачилга дэмжлэгтэйгээр байгуулагдсан Гэрлэх ёслолын ордон  өнгөрсөн хугацаанд олон зуун хосын аз жаргал, хайр сэтгэлийг баталж хамгийн  нандин мөчийг нь мөнхөлж өгсөн газар. Өв соёл, үнэт уламжлалаа сэргээн, өрх гэрийн бат бэх байдлыг хадгалж нийгэмдээ үнэтэй хувь нэмэр оруулах үйлсэд нь амжилт хүсье ээ