Мэргэжлийн сүмо бөхийн 2025 оны нэгдүгээр сарын тэмцээн болох Хацү башё Токио хотын Рёогокү Кокүгикан ордонд 1-р сарын 12-ноос 26-ны өдрүүдэд зохион байгуулагдаж өндөрлөсөн. 

Энэ удаагийн башёд Монголын 23 бөх зодоглосноос Мэргэжлийн сүмо бөхийн озэки Хошорюү С.Бямбасүрэн 12 даваа, 3 унаатайгаар түрүүлсэн юм. Ингэснээр тэрбээр ёкозүна цол хүртэж магадгүй болоод байсан юм. Озэки Хошорюү С.Бямбасүрэн нь 1999 оны 5-р сарын 22-нд Улаанбаатар хотод төрсөн бөгөөд Монгол Улсын манлай заан Д.Долгорсүрэнгийн ач, Асашёорюү Д.Дагвадоржийн ах Д.Сугаррагчаагийн дунд хүү юм.

Тэгвэл Японы сүмо бөхийн холбооны Ёкозүнагийн зөвлөл өчигдөр /2025.01.27/ хуралдаж, есөн гишүүн санал нэгтэйгээр дэмжиж, Хошорюүд С.Бямбасүрэнд ёкозүна цол олгохоор болжээ. Энэ талаарх албан ёсны ёслолын үйл ажиллагаа маргааш болох аж.