Мэргэжлийн сүмо бөхийн нэгдүгээр сарын тэмцээнд 12 даваа, гурван унаагаар тэргүүлсэн озеки Хошорюү С.Бямбасүрэнд ёкозүна цол олгох боллоо. Улмаар маргааш буюу нэгдүгээр сарын 29-нд Хошорюүг ёкозүна болсныг албан ёсоор зарлана гэлээ. С.Бямбасүрэнгийн энэ амжиүлт нь 2021 оны долоодугаар сарын тэмцээнээс хойш гурван жил хагасын дараа шинэ ёкозүна төрж буйгаараа онцлогтой. Ингэснээр тэрбээр мэргэжлийн сүмогийн 74 дэх, Монголоос аварга цолонд хүрч буй зургаа дахь бөх болж байна. Авга ах буюу аавынх нь төрсөн дүү Асашорюү Д.Дагвадорж мэргэжлийн сүмогийн 68 дахь их аварга билээ. Хошорюү Бямбасүрэн 1999 оны тавдугаар сарын 22-нд төрсөн, 16 настайдаа сүмо бөхөөр хичээллэхээр арлын Япон улсыг зорьсон. 2018 онд мэргэжлийн сүмод анхны барилдаанаа хийж, үүнээс нэг жилийн дараа 2019 оны арваннэгдүгээр сараас эхлэн жүрёо зиндаанд дэвшин барилдаж эхэлсэн.

С.Бямбасүрэнгийн аав Д.Сугаррагчаа Д.Долгорсүрэн зааны том хүү бөгөөд залуудаа үндэсний бөхөөр барилддаг байжээ. Хошорюүг сүмо бөхийн ертөнцөд авга ах Д.Дагвадоржийнхоо характер, харц, сүр хүчийг үзүүлж байна хэмээн шуугиж байна.