Нийслэлийн прокурорын газраас яллагдагч П.Эрхэст авсан цагдан хорих таслан сэргийлэх арга хэмжээний хугацааг сунгах тухай саналыг хүлээн авч шийдвэрлэсэн шүүгчийн захирамжид, яллагдагч П.Эрхэсийн өмгөөлөгч Ч.Ганзориг, Б.Батбаяр нар нь Эрүүгийн хэрэг хянан шийдвэрлэх тухай хуулийн 15.8 дугаар зүйлийн 1 дэх хэсэгт зааснаар Ерөнхий шүүгчид гомдол гаргасныг хянан хэлэлцээд.

Шүүгчийн захирамж нь хууль ёсны бөгөөд үндэслэлтэй байх хуулийн шаардлагыг хангаагүй байна. Өөрөөр хэлбэл прокуророос яллагдагч П.Эрхэст авсан цагдан хорих таслан сэргийлэх арга хэмжээний хугацааг сунгах саналыг шүүх ямар нотлох баримтад үндэслэн хүлээн авсан нь тодорхойгүй, хууль зүйн дүгнэлт хийгээгүй, ойлгомжгүй байдлаар дүгнэн цагдан хорих таслан сэргийлэх арга хэмжээний хугацааг сунгаж шийдвэрлэсэн байх тул захирамжийг хүчингүй болгож, прокурорын саналыг үндэслэн яллагдагч П.Эрхэст Монгол Улсын хилээр гарахыг хязгаарлах, хэргийн оролцогч нартай уулзахыг хориглох хязгаарлалт тогтоох таслан сэргийлэх арга хэмжээ авч шийдвэрлэв.

Хэргийг сануулахад, П.Эрхэс нь Pokerrrr нэртэй платформ ашиглан нэр бүхий 40 орчим иргэдтэй бүлэглэн сүүлийн жилүүдэд цахим мөрийтэй тоглоом зохион байгуулах, орон байраар хангах, хууль бусаар олсон орлогоороо бооцооны 1xBet ажиллуулах, өндөр үнийн дүнтэй хөдлөх болон үл хөдлөх хөрөнгө худалдан авч мөнгө угаах гэмт хэргийг зохион байгуулалттайгаар үйлдэж байсан.  Түүнчлэн Топаз нэртэй цахим мөрийтэй тоглоомын сайтын ард байдаг этгээдүүдтэй холбоотой болох нь шалгалтын ажиллагаагаар тогтоогдсон зэрэг асуудлаар шалгагдаж байгаа юм.