Томуу ба томуу төст өвчний үед хүүхдийн дархлаа, асаргаанд юуг анхаарах хэрэгтэй талаар Эх нярай эмэгтэйчүүдийн үндэсний төв /ЭНЭҮТ/-өөс зөвлөлөө.

Онцолбол, 0-5 хүртэлх насны сульдаа, цус багадалт болон тураалд ороогүй хүүхэд амьсгалын замын өвчлөлд өртсөн тохиолдолд нэмэлт бүтээгдэхүүн, витамин уух шаардлагагүйгээр вирусийг эсэргүүцэх чадавхтай. 

Харин сульдаа, цус багадалт болон тураалд орсон хүүхэд өвчлөлд өртсөн тохиолдолд витамин, төмрийн бэлдмэл зэргийг хүүхдийн эмчийн зөвлөгөөгөөр хэрэглэнэ.  

• Гэрийн асаргаа сувилгааны үед хүүхдэд ердийн уудаг хэмжээнээс нь хоёр дахин их шингэн буюу аньс, чацаргана болон будааны шүүс, хросол, ус зэргийг бага хэмжээгээр ойр ойрхон уулгана
• 0-2 насны хүүхдийн хамрын битүүг байнга арилгаж, унтах үед цээжийг 30-40 хэм өндөрлөнө. Ингэснээр хүүхэд цэрэндээ хахахгүй байхаас гадна амьсгалахад нь тохиромжтой нөхцөл бүрддэг. 
• Усанд оруулах нь хүүхдийн ханиад хүндрэх нөхцөл болохгүй бөгөөд гарахад нь гэрийн орчин дулаан байх хэрэгтэй
• Бор хоолонд орсон хүүхдэд амин дэмээр баялаг, ногоотой, тослог, нүүрс усаар баялаг хоолыг байнга идүүлэх нь дархлааг дэмждэг 
• Хөхүүл хүүхдийг хүссэн үед нь хангалттай цадах хэмжээнд нь хөхүүлэх хэрэгтэй
• Томчууд болон том хүүхдүүд тогтмол маскаа зүүж, гараа угааж ариутгах нь бага насны хүүхдэд халдвар дамжихгүй байх нөхцөлийг бүрдүүлнэ