УБЦТС ТӨХК-иас хоёр тарифт тоолуурыг гурав руу шилжүүлж төлбөрөө бууруулах боломжтой гэлээ. Тодруулбал, хоёр тарифт тоолууртай өрхийн цахилгааны үнийг хэрэглээний шатлалаас хамаарч тооцож буй. 

Харин гурван тарифт тоолуур руу шилжүүлснээр 06.00-17.00 цаг хүртэлх хэрэглээ 220 төгрөгөөр, 17.00-21.00 цагийн хэрэглээ 300 төгрөгөөр, 21.00-06.00 цагийн хэрэглээ 113 төгрөгөөр тооцогдох юм. Мөн оргил ачааллын 17.00-21.00 цагт хэрэглээгээ тохируулбал төлбөр 20 болон түүнээс дээш хувиар буурах боломжтой гэлээ. Иргэд тоолуураа гурван тарифт шилжүүлэхийн тулд УБЦТС ТӨХК-ийн Хэрэглэгчдэд үйлчлэх төвд хандаж хүсэлт гаргана. Хүсэлтийн дагуу мэргэжлийн хүмүүс ажиллаж, тухайн иргэний тоолуурыг програм шинэчилж тохируулга хийх эсвэл сольж шинээр суурилуулах эсэхийг шийдэх юм. Өөрөөр хэлбэл иргэн таны өнөөдрийн хэрэглэж буй тоолуураас хамаарч солих эсвэл тохируулга хийснээр гурван тарифт тоолуурт шилжих аж.