Ардчилсан Монгол Улсын анхны ерөнхийлөгч Пунсалмаагийн Очирбат орчлонгийн мөнх бусыг үзүүлсэнд гүнээ харамсаж, гэр бүл, төрөл төрөгсөд, анд нөхөд, хамт олонд нь гүн эмгэнэл илэрхийлье.

Пунсалмаагийн Очирбат нь улс орныхоо шашин, соёлын үнэт өвийг сэргээн хөгжүүлэхэд онцгой үүрэг гүйцэтгэсэн билээ.

Тэрээр төр түмний их шүтээн Жанрайсиг бурханы шүтээнийг сэргээн залах түүхэн их үйлсийг эхлүүлсэн юм.

Сүм хийдүүдийг дахин сэргээх, шинээр байгуулах үйл ажиллагаанд анхаарал хандуулж, зөвлөхүүдийг томилон ажиллуулж байсан нь монголчуудын сүсэг бишрэл, соёлын өвийг хамгаалахад онцгой ач холбогдолтой байсан юм.

Мөн шашин хоорондын эв нэгдлийг бэхжүүлэхэд санаачилга гарган, төлөөлөгчдийн уулзалтыг зохион байгуулж байв.

Төрийн тахилгат уул овоог бурханы шашны ёс дагуу тахих уламжлалыг сэргээн, түүх соёл, зан заншлаа хадгалан хөгжүүлэхэд үнэтэй хувь нэмэр оруулсан байна.

Мөн бурханы шашны шинэ боловсон хүчин, эрдэм мэдлэгтэй лам хуврагуудыг гадаадад сургах, шашны боловсролыг дэмжих үйлсэд өөрийн дэмжлэгийг харамгүй үзүүлсэн нь өнөөгийн шашин, соёлын хөгжлийн суурийг тавьсан томоохон гавьяа билээ.

Тэрбээр өөрийн үйлдсэн их буяны үрээр энх амгалант дараа төрлөө түргэнээ олохыг Монголын нийт лам хуврагууд, сүсэгтэн олон залбиран ерөөж байна.

Гандантэгчэнлин Хийд