Тайланд улс өнөөдрөөс жуулчдад хилээ нээлээ. ДНБ-ийхээ үлэмж хэсгийг аялал жулчлалын салбараас бүрдүүлдэг тус улс  цар тахлын улмаас хилээ 18 сарын турш хаалттай байлгасны эцэст ийнхүү нээж байгаа нь энэ юм. Хил нээгдсэнээр Тайланд руу 60 гаруй улс орны вакцины тундаа бүрэн хамрагдсан иргэд аялал жуулчлалын зорилгоор зорчих эрхтэй болж байна. Эдгээр жуулчдыг бага эрсдэлтэйд тооцож, зочид буудалд тусгаарлахгүй гэнэ.

Судалгааны байгууллагуудын гаргасан дүнгээр, ирэх жил тус улсад зорчих жуулчдын тоо 15 саяд хүрч, 30 тэрбум ам.долларын орлого төлөвтэй байгаа ажээ. Дашрамд хэлэхэд, Тайландын зарим муж одоо ч хорио цээрийн дэглэмтэй байгаа бөгөөд хүн амын 42 хувь нь л вакцины бүрэн тундаа хамрагдаад байгаа юм. Тодруулбал, улсын хэмжээнд өдөр бүр 10 000 гаруй шинэ тохиолдол бүртгэгдэж байгаа ажээ.     

Энэ үйл явдлыг аялал жуулчлалын үйлчилгээ эрхэлдэг компанийн эзэн Чайягорн Буньяпак гэгч “Хонгилын үзүүрт гэрэл ассан” хэмээн зүйрлүүлсэн байна. Гэхдээ Чайягорн Буньяпак ч тэр, ижил салбарт ажилладаг бусад найз нөхөд нь ч тэр үйлчлүүлэгчидтэйгээ холбоо тогтоогоогүй, ер нь шийдвэр хэрэгжтэлээ сар болно гэсэн төсөөлөлтэй байгаа ажээ.