Монгол Улсын Ерөнхийлөгч У.Хүрэлсүх Бүгд Найрамдах Казахстан Улсад хийж буй төрийн айлчлал үргэлжилж байна.

Айлчлалын хүрээнд хоёр орны төрийн тэргүүн хэлэлцээ хийж, улмаар хамтарсан хэвлэлийн бага хурал хийж, хэлэлцсэн асуудлын талаар хэвлэл мэдээллийн хэрэгслийн төлөөлөгчдөд мэдээлэл өгчээ.

Хэлэлцээний дүнгээр Монгол Улс болон Бүгд Найрамдах Казахстан Улсыг холбосон автозам байгуулах шаардлагатай гэж үзсэн талаар Ерөнхийлөгч Касым-Жомарт Токаев мэдэгдсэн байна. Түүний өгүүлснээр, төсөл эхлүүлэхээс өмнө хүндрэлтэй асуудлуудыг хэлэлцэн шийдвэрлэх Засгийн газар хоорондын комисс байгуулах аж.

Түүнчлэн Монгол Улсын Ерөнхийлөгч У.Хүрэлсүхийн айлчлал Казахстанд онцгой ач холбогдолтой гэж Ерөнхийлөгч Касым-Жомарт Токаев онцлоод улс төр, эдийн засаг, соёл хүмүүнлэг болон бусад салбарын хамтын ажиллагаагаа цаашид улам хөгжүүлэхээр тохиролцсон хэмээжээ.

Айлчлалын үеэр олон талт асуудлыг хөндөн ярилцсаны дээр Баян-Өлгий аймагт Бүгд Найрамдах Казахстан Улсын Консулын хэлтэс байгуулахаар тохиролцсон байна.