Монголын Бурханы Шашинтны Төв Гандантэгчэнлин хийдээс Бурхан багшийн манлай хоёр шавь болох Шаарийбуу болон Монголжийбуу хувилгаадын нандин шүтээнийг эх орондоо залан ирж, Монголын сүсэгтэн олонд мөргөж залбирах ховорхон завшааныг бүрдүүлсэн нь шашин, соёлын төдийгүй сүсэг бишрэлийн ихээхэн ач холбогдолтой үйл хэрэг боллоо. Олон зуун жилийн туршид Бурхан шашны үнэт өв болон хадгалагдан ирсэн энэхүү нандин шүтээнийг өөрийн нүдээр үзэж, мөргөн хүндэтгэх боломж олдсон нь сүсэгтэн олны хувьд ховор завшаан байв. Энэхүү үйл ажиллагаа нь ард олны сүсэг бишрэлийг бататгаж, Бурхан багшийн сургаал номын үнэ цэнийг улам тодруулсан онцгой үйл явдал болсон юм.

Тус хүндэтгэл ёслолын арга хэмжээг амжилттай зохион байгуулж, сүсэгтэн олны горилыг ханган, номын үйлсийг дэлгэрүүлэхэд хүчин зүтгэсэн Гандантэгчэнлин хийдийн эрдэмтэн лам хуврагууд, Гадаад харилцаа хариуцсан алба, Ёслолын алба, Олон нийттэй харилцах алба болон оролцсон бүх лам хуврагуудад чин сэтгэлийн талархал илэрхийлье. Та бүхний хичээл зүтгэл, сэтгэл зориулалт, зохион байгуулалтын үр дүнд олон мянган сүсэгтэн энэхүү нандин шүтээнд мөргөж, буян хураах завшааныг эдэллээ. Энэхүү онцгой үйл явдал нь хойч үедээ өвлөгдөн үлдэх соён гэгээрлийн үнэт хувь нэмэр мөн билээ.