Өмнөд Солонгосын алдарт дуучин G-Dragon энэ амралтын өдрүүдэд Сөүл хотын KSPO Dome-д болсон анхны бие даасан фен уулзалтынхаа үеэр BIGBANG хамтлаг энэ онд эргэн ирэх болсныг мэдэгдлээ. Түүний хэлснээр, тус хамтлаг 20 жилийн ойгоо тохиолдуулан албан ёсны comeback хийхээр төлөвлөж байгаа аж.

G-Dragon хоёрдугаар сарын 6-8-нд зохион байгуулсан гурван өдрийн фен уулзалтаараа нийт 40 мянга орчим фенүүдтэй уулзсан талаар Солонгосын хэвлэлүүд мэдээлсэн байна. Уулзалтын үеэр тэрээр “Энэ жил BIGBANG-ийн 20 жилийн ой тохиож байна. Бид эргэн ирэх болно” хэмээн мэдэгдсэн тухай Korea JoongAng Daily, The Korea Times зэрэг хэвлэлүүд онцолжээ.

BIGBANG хамтлаг 2006 онд дебют хийснээс хойш Азийн хөгжмийн зах зээлд хүчтэй нөлөө үзүүлж, “Haru Haru”, “Fantastic Baby”, “Bang Bang Bang” зэрэг олон улсын хит уран бүтээлүүдээрээ танигдсан. Сүүлийн жилүүдэд хамтлагийн гишүүдийн бие даасан уран бүтээл, цэргийн алба болон бусад шалтгааны улмаас хамтын үйл ажиллагаа хязгаарлагдмал байсан юм.

Одоогоор comeback-ийн тов, шинэ цомог эсвэл синглийн талаарх нарийвчилсан мэдээлэл албан ёсоор зарлагдаагүй байна. Гэсэн ч G-Dragon-ийн энэхүү мэдэгдэл нь фенүүдийн дунд ихээхэн хүлээлт үүсгээд байна.

Хөгжмийн салбарын ажиглагчдын үзэж буйгаар, BIGBANG-ийн 20 жилийн ойд зориулсан эргэн ирэлт нь К-попын зах зээлд томоохон үйл явдал болох төлөвтэй байна.