БНСУ-ын “ASTRO” хамтлагийн гишүүн, дуучин, жүжигчин Ча Ын Ү-г 20 тэрбум вон буюу ойролцоогоор 13.6 сая ам.долларын татварын зөрчилтэй холбоотой асуудлаар Солонгосын Үндэсний татварын алба (NTS)-наас шалгаж эхэллээ. Татварын байгууллагаас түүний орлоготой холбоотой санхүүгийн бүтэц, компанийн үйл ажиллагаанд нарийвчилсан шалгалт хийж, нэмэлт татвар ногдуулах шийдвэр гаргасан байж болзошгүй талаар эх сурвалжууд дурдсан байна.

Мэдээлэлд дурдсанаар шалгалт 2025 оны долдугаар сард, Ча Ын Ү цэргийн албанд мордохоос өмнөхөн хийгдсэн бөгөөд түүний орлогын тодорхой хэсгийг гэр бүлийнхний нэр дээр бүртгэлтэй компанийн бүтэц ашиглан зохицуулсан байж болзошгүй эсэхийг нягталжээ. Татварын байгууллага уг компанийг бодит үйлчилгээний үйл ажиллагаа явуулаагүй, татварын ачааллыг бууруулах зорилготой “цаасан компани” байх магадлалтай хэмээн үзсэн тухай мэдээлж байна.

Харин Ча Ын Ү-гийн харьяалагддаг Fantagio агентлаг албан ёсны мэдэгдэлдээ одоогоор эцсийн шийдвэр гараагүй, асуудлыг хууль ёсны хүрээнд тайлбарлаж, татварын байгууллагатай хамтран ажиллаж байгаа гэдгээ илэрхийлжээ. Мөн татварын тайлбар, хууль хэрэгжилтийн зөрүүтэй ойлголтоос үүдсэн маргаан байж болзошгүй тул холбогдох журмын дагуу гомдол гаргаж, дахин хянуулах хүсэлт тавьсан гэх мэдээлэл байна.

Энэхүү мэдээллийн дараа зарим брэндүүд сурталчилгааны хамтын ажиллагаандаа өөрчлөлт оруулж эхэлсэн тухай Солонгосын хэвлэлүүд онцолсон байна. Ча Ын Ү нь 2025 оноос эхлэн БНСУ-ын цэргийн алба хааж байгаа бөгөөд 2027 онд албаа дуусгах төлөвтэй байгаа юм.

Одоогоор уг хэрэгт холбогдуулан шүүхийн эцсийн шийдвэр гараагүй бөгөөд шалгалтын ажиллагаа үргэлжилж байна.