Загварын ертөнцийг улаан өнгөөр тодорхойлж, тансаг дэгжин хэв маягийг бий болгосон Италийн домогт загвар зохион бүтээгч Валентино Гаравани 93 насандаа таалал төгсжээ. Тэрээр 2026 оны нэгдүгээр сарын 19-нд Ром хот дахь гэртээ нас барсан тухай түүний нэрэмжит сан болон ойрын эх сурвалжууд мэдээлжээ .

“Valentino red” хэмээн дэлхий даяар танигдсан улаан өнгийг загварын бэлгэ тэмдэг болгосон тэрээр 1960-аад оноос эхлэн өндөр загварын ертөнцөд ноёрхож, эмэгтэйлэг, тансаг, цаг хугацаанд үл хуучрах загваруудаараа алдартай болжээ. Түүний бүтээлийг АНУ-ын тэргүүн хатагтай асан Жаки Кеннеди, Холливудын од Элизабет Тейлор, Их Британийн гүнж Диана зэрэг дэлхийн нөлөө бүхий бүсгүйчүүд өмсөж ирсэн нь түүний нэр хүндийг улам бататгасан юм .

Валентино 1959 онд өөрийн нэрэмжит Maison Valentino загварын ордныг байгуулж, haute couture буюу дээд зэрэглэлийн загварын салбарт шинэ эрин авчирсан нэгэн хэмээн үнэлэгддэг. Тэрээр 2008 онд идэвхтэй уран бүтээлээсээ зодог тайлсан ч түүний нөлөө өнөөг хүртэл дэлхийн загварын чиг хандлагад хадгалагдсаар ирсэн байна .

Түүний таалал төгссөнтэй холбогдуулан олон улсын хэвлэлүүд, загварын орднууд, дизайнерууд Валентино Гаравани-г “загварын түүхэнд улаанаар бичигдэх суут уран бүтээлч” хэмээн хүндэтгэн дурсаж эхэлжээ .