“Грэмми”-д 10 удаа нэр дэвшиж байсан АНУ-ын алдарт рэппер Wiz Khalifa Румын улсад зохион байгуулагдсан хөгжмийн фестивалийн үеэр тайзан дээр каннабис хэрэглэсэн хэрэгт холбогдож, 9 сарын хорих ял сонслоо.

Associated Press (AP News)-ийн мэдээлснээр, уг хэрэг 2024 оны долоодугаар сард Румын улсын Констанца хотод болсон “Beach, Please!” хөгжмийн фестивалийн үеэр гарсан байна. Wiz Khalifa тоглолтынхоо үеэр тайзан дээр каннабис хэрэглэсэн бөгөөд дараа нь Румыны хууль сахиулах байгууллагууд түүнийг шалгаж, биед нь 18 граммаас дээш хэмжээний каннабис илрүүлсэн гэж үзжээ.

Уг хэргийг Румын улсын Констанцагийн давж заалдах шатны шүүх хэлэлцэн, түүнийг хууль бусаар мансууруулах бодис хэрэглэсэн, хадгалсан гэм буруутайд тооцож, 9 сарын хорих ял оноосон байна. Анх анхан шатны шүүхээс торгууль ногдуулж байсан ч прокурорууд давж заалдсанаар ял хүндэрсэн талаар AP News онцолжээ. 

Румын улс мансууруулах бодисын хэрэглээ, хадгалалттай холбоотой хуулиа хатуу мөрддөг бөгөөд олон нийтийн өмнө, тэр дундаа тайзан дээр ил хэрэглэсэн тохиолдлыг ноцтой зөрчилд тооцдог гэдгийг гадаадын хэвлэлүүд тайлбарлажээ.