Өмнөд Солонгосын бүтээл "KPop Demon Hunters" нь Netflix-ийн бүх цаг үеийн хамгийн их үзэлттэй кино болж, дэлхийн кино сонирхогчдын шинэ рекордыг тогтоолоо.

Тус кино энэ оны зургаадугаар сарын 20-нд "Netflix"-ээр нээлтээ хийснээс хойш ердөө хоёр сарын дотор нийт 236 сая үзэлт авч, 2021 онд гарсан Red Notice (230.9 сая үзэлт)-ийг даван түүхэнд бичигдэв.

Netflix-ийн албан ёсны мэдээллээр уг амжилтыг платформын 91 хоногийн үзэлтийн тооцооллоор баталгаажуулсан байна.

K-pop хөгжмийн элемент, поп соёлын дүрслэл, адал явдал хосолсон уг кино нь олон улсын үзэгчдийн дунд хүчтэй давалгааг үүсгэж, зөвхөн Солонгос төдийгүй дэлхий даяар эрэлттэй болжээ. Сүүлийн долоо хоногт гэхэд л кино дахин 26 сая гаруй удаа үзэгдсэн нь түүний нэр хүнд буураагүйг харуулж байна.