Америкийн кино академиас зохион байгуулдаг 98 дахь удаагийн "Оскар"-ын наадмын шагнал гардуулах ёслолын арга хэмжээнд Монгол улсыг төлөөлөн оролцох кино бүтээлийг сонгон шалгаруулах гэж байна.

Монголын үндэсний кино урлагийн зөвлөл 2024-2025 онд бүтээгдсэн монгол кинонуудаас нэг бүтээлийг тус наадмын “Олон улсын шилдэг кино” төрлийн урьдчилсан сонгон шалгаруулалтад явуулах юм. Шалгаруулалтад нэр дэвшүүлэх бүтээлүүдийг ирэх сарын 22-ныг хүртэл цахимаар бүртгэнэ. Ингэхдээ Монгол улсад өнгөрсөн оны 10 дугаар сарын 1-нээс 2025 оны 9 дүгээр сарын 30-ны хооронд ашгийн зорилгоор долоо хоногоос багагүй хугацаанд кино театрт гарсан байх шаардлага тавина. Мөн 40 минутаас дээш үргэлжлэх хугацаатай, киног бүтээхэд монгол уран бүтээлчид голлох үүрэгтэйгээр оролцсон, кино театрын үзвэрийн өмнө эсвэл тухайн үед олон нийтэд хүрээгүй байх шаардлагатай ажээ.

"Оскар"-ын шагнал гардуулах ёслол ирэх оны гуравдугаар сарын 15-нд АНУ-ын Лос Анжелес хотноо болно.

Дашрамд дурдахад, 96 дахь удаагийн наадмын урьдчилсан шалгаруултад Монголыг төлөөлөн оролцох киногоор "Сэр сэр салхи" шалгарч байв.