Солонгосын “NewJeans”-ийг менежмент хийдэгээрээ танигдсан “ADOR” компани гүйцэтгэх захирлаа сольж, Lee Do-kyung-ийг шинэ захирлаар томилсон талаар албан мэдээлэл гарлаа.

Lee Do-kyung нь 2019 оноос HYBE-д ажиллаж эхэлсэн бөгөөд 2022 онд тус компанийн IPX бизнесийн нэгжийн вице ерөнхийлөгчөөр томилогдон, уран бүтээлчдийн IP-г ашиглан худалдаа, фан үйлчилгээний олон төслийг удирдсан туршлагатай. Түүний голлох ажлуудын нэг нь “THE CITY” нэртэй, концерт зохион байгуулагдсан хотуудад шүтэн бишрэгчдэд зориулсан тусгай үйлчилгээ, контент санал болгодог томоохон төсөл байсан юм.

“ADOR”-ийн зүгээс Lee Do-kyung-ийн томилгоог “Альбом, концерт зэрэг уран бүтээлчдийн үйл ажиллагааг төлөвлөж, удирдах үйл явцыг бэхжүүлэх зорилготой” гэж тайлбарлажээ.

Энэхүү удирдлагын өөрчлөлт нь өмнө нь түр орлон гүйцэтгэгчээр ажиллаж байсан Kim Ju-young-ийн хугацаа дууссантай холбоотой бөгөөд компанийн дотоод зохион байгуулалтыг тогтворжуулах, уран бүтээлчдэд илүү хурдан, үр дүнтэй дэмжлэг үзүүлэх алхам гэж олон нийт үзэж байна.

Гэсэн хэдий ч ADOR болон HYBE-ийн хоорондын зөрчил, NewJeans хамтлагийн маргаантай нөхцөлд гарч буй энэхүү томилгоо нь олон нийтийн дунд янз бүрийн хүлээлт, маргаан дагуулж буйг салбарын хэвлэлүүд онцолж байна.