Өмнөд Солонгосын алдарт дуучин, “Running Man” нэвтрүүлгийн гишүүн Ким Жон Күүк хуримаа хийх гэж буйгаа албан ёсоор мэдэгдлээ.

Тэрбээр наймдугаар сарын 18-нд “Running Man” нэвтрүүлгийн зураг авалтын үеэр “Би гэрлэж байна” хэмээн зарласан нь хамтран ажиллагсад болон үзэгчдэд гэнэтийн бэлэг болсон юм.

Мөн тэр өдөр өөрийн албан ёсны фэн клуб дээр гар бичмэл захидал нийтэлж:

“…Би хуримын тухай бичих өдөр ирнэ гэж сэтгэлдээ төсөөлж байсан ч яг одоо бичиж байхдаа өмнөхөөсөө илүү сандарч байна. Би гэрлэж байна. Олон хүн гэнэтийн мэдээ гэж хүлээж авах байх…” хэмээн сэтгэлээ хуваалджээ.

Ким Жон Күүк энэ жил уран бүтээлийн 30 жилийн ойгоо тэмдэглэж буй бөгөөд “альбом гаргахын оронд амьдралын шинэ хуудас нээж байна” хэмээн онцлон тэмдэглэсэн байна.

Хуримын ёслолыг дотнын гэр бүл, ойрын хүмүүсийн хүрээнд, нам гүм зохион байгуулах аж. Харин бэрийн талаарх дэлгэрэнгүй мэдээлэл одоогоор ил болоогүй байна.

Ийнхүү Солонгосын хөгжмийн ертөнцөд өөрийн хүчирхэг хоолой, урт удаан уран бүтээлээрээ үнэлэгдсэн Ким Жон Күүк шинэ амьдралынхаа эхлэлийг тавьж байна.