Өмнөд Солонгосын алдарт Seventeen хамтлаг ЮНЕСКО-д 250,000 ам.долларын хандив өргөсөн тухай албан ёсоор мэдээллээ. Энэхүү хандив нь хамтлагийн зохион байгуулсан “JOOPITER presents: sacai x SEVENTEEN” хандивын дуудлага худалдаанаас цугларсан орлогоос бүрдсэн бөгөөд дэлхийн залуучуудын бүтээлч байдал, сайн сайхан байдлыг дэмжихэд зориулагдсан байна.

Хандивын мөнгө нь Seventeen болон ЮНЕСКО хамтран хэрэгжүүлж буй “Going Together – For Youth Creativity and Well-Being” хөтөлбөрийг дэмжихэд чиглэгдэж байгаа бөгөөд тус хөтөлбөр нь 18-30 насны залуучуудын удирдлага дор дэлхийн 70 гаруй орны 100 гаруй залуучуудын бүтээлч төсөл, үйл ажиллагааг санхүүжүүлдэг юм.

Seventeen хамтлаг нь 2023 оны 11-р сард Парис хотноо болсон ЮНЕСКО-гийн 13 дахь Залуучуудын Форумд оролцож, анх удаа K-pop уран бүтээлчдийн хувьд тусгай хуралдаанд оролцож, үг хэлж, тоглолт хийсэн билээ. Мөн энэ үеэр тэд ЮНЕСКО-гийн залуучуудын сайн дурын элчээр томилогдсон түүхэн үйл явдал болж байв.

Хандивын дуудлага худалдааг алдарт япон загварын брэнд sacai болон Pharrell Williams-ийн үүсгэн байгуулсан JOOPITER платформтой хамтран зохион байгуулсан бөгөөд хамтлагийн гишүүдийн өмссөн, гарын үсэг зурсан хувцас болон өвөрмөц эд зүйлсийг худалдаалсан юм.

Seventeen хамтлагийн энэхүү үйл ажиллагаа нь дэлхийн залуучуудын бүтээлч байдал, сайн сайхан байдлыг дэмжихэд томоохон хувь нэмэр болж байгаа бөгөөд олон улсын түвшинд тэдний нэр хүнд, нөлөөг улам бэхжүүлж байна.