2025 оны долдугаар сарын 5-нд Сөүл хотын Гоянг цэнгэлдэх хүрээлэнд болсон BLACKPINK хамтлагийн DEADLINE дэлхийн аялан тоглолтын нээлтийн тоглолтын үеэр хамтлагийн гишүүн Jennie тайзан дээр арын албаны ажилчидтай харьцсан үйлдэл олон нийтийн анхаарлыг татаж, шүүмжлэл дагуулаад буй.

Тоглолтын үеэр Jennie-ийн гутлын үдээс тайлагдсан бөгөөд тэрбээр тайзан дээр гэнэт зогсож, ажилчдаас үдээсийг нь үдэхийг шаардсан байна. Эхний оролдлого бүтэлгүй болсон тул Jennie удаа дараа чанга дуугаар хэлсэн нь зарим үзэгчдийн зүгээс “хэтэрхий дээрэнгүй, ажилчдыг хүндлээгүй үйлдэл” хэмээн дүгнэгдсэн байна. Харин зарим фэнүүд “тоглолтын дуу чимээ ихтэй орчинд заавар хүргэх шаардлага байсан, гэнэтийн нөхцөлд үг хэлэх нь хэвийн” гэж хамгаалжээ.

Цахим орчинд тарсан бичлэгийн доор Reddit болон X (хуучнаар Twitter)-ийн хэрэглэгчид:

“Тайзан дээр ийм үйлдэл гаргаж байгаад харамсаж байна.” “Гутлаа өөрөө үдэхэд юу нь болохгүй гэж?” “Дуу чимээ ихтэй орчинд яарч байхдаа хашгирч заавар өгөхөөс өөр аргагүй байсан байх.” хэмээн янз бүрийн байр суурийг илэрхийлсэн байна.

BLACKPINK-ийн DEADLINE аялан тоглолт гурван жилийн дараах хамтын анхны тоглолт бөгөөд нээлтийн хоёр өдрийн тоглолтод нийт 78,000 үзэгч цугласан амжилттай болжээ. Тэд аялан тоглолтоо үргэлжлүүлэн АНУ, Канад, Европ, Азийн 16 улсын 31 хотод хийхээр төлөвлөсөн байна. Jennie болон BLACKPINK талаас уг бичлэгийн талаар албан ёсны тайлбар одоогоор гараагүй байгаа бөгөөд зарим фанат, мэргэжилтнүүд “тасралтгүй тоглолтын хуваарь, их ачаалал, шуурхай шийдвэр гаргах шаардлага дундах байдал байж болох” хэмээн хүлээцтэй хандахыг уриалж байгаа юм.