Солонгосын алдарт HYBE агентлаг энэ оны сүүлээр Энэтхэгт салбараа нээхээр төлөвлөж байгааг олон улсын хэвлэлүүд мэдээллээ.

HYBE нь Энэтхэгийн зах зээлд нэвтэрч, тус улсын уран бүтээлчидтэй хамтарч ажиллах, K-pop контент үйлдвэрлэл, тоглолт зохион байгуулах зорилготой аж. Тус агентлагийн төлөвлөгөөгөөр энэ оны 9-10-р сард салбараа нээхээр судалгаа, бэлтгэл ажил хийгдэж байгаа гэж мэдээлжээ.

Энэтхэг нь 1.4 тэрбум хүн амтай, залуу хүн амын эзлэх хувь өндөр, K-pop соёлыг дэмжигч фэнүүд олонтой орон тул HYBE-ийн хувьд стратегийн чухал зах зээлд тооцогдож байгаа аж. HYBE өмнө нь АНУ, Япон, Латин Америкт салбараа нээж байсан туршлагатай бөгөөд Энэтхэгт салбараа нээснээр BTS, Seventeen зэрэг хамтлагуудын тоглолт зохион байгуулах боломж нээгдэх хүлээлт олон нийтийн дунд үүсээд байна.

HYBE-ийн зүгээс Энэтхэгт салбараа нээж, K-pop соёл, хөгжмийн үйлдвэрлэлийг олон улсын зах зээлд өргөжүүлэх стратеги хэрэгжүүлж байгаагаа онцолжээ.