БНСУ-ын хөгжмийн томоохон агентлаг HYBE Labels ирэх наймдугаар сард шинэ хөвгүүдийн хамтлагаа олон нийтэд танилцуулахаар бэлтгэж байгаа талаар албан ёсоор зарлалаа. Энэ нь тус агентлагийн зүгээс 2019 онд TXT (Tomorrow X Together) хамтлагийг дебют хийлгэснээс хойших анхны эрэгтэй хамтлаг болж байгаа юм.

Шинэ хамтлагийн гишүүд дуу хөгжмийн бүтээл, бүжгийн найруулга, клипийн зураг авалт зэрэг бүтээлч үйл явцад идэвхтэй оролцдог “Шинэ үеийн уран бүтээлчид” байх аж. Тэднийг “Next-Generation creator crew” гэж тодорхойлж байгаа нь "HYBE"-ийн бүтээлч залуусыг дэмжих стратегийн нэг хэсэг хэмээн үзэж байна.

Одоогоор хамтлагийн нэр болон гишүүдийн бүрэлдэхүүн албан ёсоор зарлагдаагүй байгаа ч интернэт хэрэглэгчдийн дунд James, Martin зэрэг нэрс хөврөх болжээ. Шүтэн бишрэгчид энэ дебютийг тэсэн ядан хүлээж, тэдний анхны уран бүтээл, дүр төрх, концепцийг сонирхож буйгаа илэрхийлсээр байна.

HYBE-ийн энэхүү шинэ төслийг олон улсын K-pop фэнүүд төдийгүй хөгжмийн салбарын мэргэжилтнүүд ч анхааралтай ажиглаж байгаа бөгөөд тус хамтлаг K-pop-ийн дараагийн “Алтан үе”-ийн төлөөлөгч болж магадгүй хэмээн үзэж байна.