Солонгосын алдарт уран бүтээлч GD өсвөр насныхны дунд түгээмэл тулгамдаж буй согтууруулах ундаа болон мансууруулах бодисын донтолтын асуудлыг шийдвэрлэхэд хувь нэмэр оруулахаар ₩880 сая воны хандив өргөлөө.

Тэрбээр энэхүү хандивыг 2025 оны зургаадугаар сарын 13-нд Сөүл хотноо болсон “Peaceminusone Premium Highball Launch Party – The Signal” арга хэмжээний үеэр зарласан юм. Хандивын мөнгийг “Purme Foundation” төрийн бус байгууллагад хүлээлгэн өгсөн бөгөөд энэ нь өсвөр үеийнхний эмчилгээ, сэтгэлзүйн сэргээн засах үйлчилгээ болон нийгэмшүүлэх хөтөлбөрүүдэд зориулагдах аж. 

GD өмнө нь ч олон нийтийн сайн сайхны төлөө боловсрол, эрүүл мэнд, байгаль хамгааллын чиглэлээр тогтмол хандив өргөж байсан туршлагатай. Энэ удаагийн дэмжлэг нь түүний нийгмийн хариуцлагатай уран бүтээлчийн байр суурийг дахин нотолж байна.

Мэргэжилтнүүдийн зүгээс өсвөр насныхны дунд архи, мансууруулах бодисын хэрэглээ нэмэгдэх хандлагатай байгаа тул энэхүү хандив цаг үеэ олсон, бодит дэмжлэг болж байгааг онцолжээ.