Бурхан багшийн Их Дүйчин өдөр зуны тэргүүн сарын шинийн 15-ны өдөр тохиодог. Энэ жилийн тухайд 6 дугаар сарын 11 буюу маргаашийн лхагва гаригт тохиож байна. 

Нийтээр тэмдэглэх баярын болон тэмдэглэлт өдрүүдийн тухай хуульд зааснаар энэ өдрийг зуны тэргүүн сарын 15-нд хуульчилснаар бүх нийтээр амардаг.  2025 оны тухайд энэ өдрийг “Амар амгаланг хамтдаа түгээе” уриан дор эв нэгдэл, энэрэл нигүүлсэл, сэтгэлийн хөгжил, өв соёлоо эрхэмлэх өдөр болгон тэмдэглэх ба орон даяар хурал ном, сургалт, урлаг соёлын олон талт үйл ажиллагаа зохион байгуулах гэж байна. Жил бүр Монголчууд Бурхан багшийн Их Дүйчин өдөр буюу зуны тэргүүн сарын шинийн 15-ны бэлэгт сайн өдөр буян номын үйлийг ихээр дэлгэрүүлэн, сүсэгтэн олныг хамтруулан Монголын Бурхан шашинтны төв Гандантэгчэнлин хийд, Улаанбаатар хот болон хөдөө орон нутгийн сүм хийдүүд, төрийн бус болон сайн дурын байгууллагын оролцоотой дор бүрнээ өргөн дэлгэр тэмдэглэсээр ирсэн. 2013 оноос эхлэн бурхны шашныг дэлгэрүүлэгч, дэмжигч, байгууллага, клуб, иргэдийн санаачилгаар Бурханы шашинтны наадам болгон зарлаж Гандантэгчэнлин хийд дээр төвлөрөн уламжлалт үйл ажиллагаанаас гадна хийдийг тойрон гороолох парад буюу жагсаал, хүүхэд залууст зориулсан жүжигчилсэн тоглолт зэрэг залуусыг хамарсан орчин үеийн чиг хандлагатай үйл ажиллагааг зохион байгуулж эхэлсэн билээ. Энэ өдөр бол Бурхан багшийн лагшин мэндэлж, төгс гэгээрлийн хутгийг олж, нирваан дүрийг үзүүлсэн гурван үйл зохиол давхацсанаараа бусад дүйчин өдрөөс онцлогтой.

Маргааш буюу зургаадугаар сарын 11-ний өдөр ерөнхий үйл ажиллагаа,  

• МБШТөв Гандантэгчинлэн хийд
• Сүхбаатарын талбайд тус тус болно. 

Тухайлбал, Гандантэгчинлэн хийд дээр үүрийн 04:00-04.30 цагийн хооронд Брайвүн лосаллин дацангийн Хансүр, гэвш лхаарамба, тэргүүн их хамба лам нэг өдрийн тэтгэн ариусахуй буюу "Тэгчин сожин"-г лам хуврагууд болон сүсэгтэн олонд хүртээнэ. Нийт лам хуврагууд даян дэлхийн энх амгалан оршихуйд зориулан Бурхан багшийн чого хурснаар энэ өдрийн үйл ажиллагаа эхэлнэ. Түүнчлэн урлагийн тоглолт, МУ-ын төрийн тэргүүн, МУ-д суугаа элчин сайдын яамдын төлөөлөл мэндчилгээ хүргэнэ. 

Харин Сүхбаатарын талбайд нийтийн бясалгал, урлагийн тоглолт, амирлан оршихуйн лекц, Open mic, Stand up comedy, Чингис хааны сэрэг дүрд хүндэтгэл үзүүлэн сан хурж, мандал өргөх ёслол зэрэг олон талт үйл ажиллагаа болно.  Эндээс онцлоход, Сүхбаатарын талбайгаас Гандантэгчэнлин хийд хүртэл ёслол хүндэтгэлийн жагсаал болно. Мөн Гандантэгчэнлин хийд дээр гэрэлт зул, тахил өргөж үйл ажиллагаа болно. 

Их Дүйчин өдрийн баярын ёслол хүндэтгэлийн үйл ажиллагааны ерөнхий хөтөлбөртэй ЭНД дарж танилцаарай.