Хоёр удаа хорт хавдрыг ялан дийлсэн уран бүтээлч В.Тулгат буюу Tulleti America’s Next Top Hitmaker тэмцээнд оролцоно. 

Big Gee, Rokitbay нартай хамтарсан “Микрофоны ард” дуугаараа олонд танигдсан реппер Тулгат буюу Tulleti нь Rolling Stone сэтгүүлээс зохион байгуулж буй “America’s Next Top Hitmaker” арга хэмжээнд оролцохоор болсон тухайгаа өөрийн инстаграм хаягаар мэдэгджээ. Тэрбээр хөгжмийн хажуугаар байгууллага, брендүүдэд хэрэглэгчийн үйлчилгээ үзүүлдэг Chirpish хэмээх компанийг байгуулж АНУ-д үйл ажиллагаагаа явуулж буй ентрепренер  билээ. Тархины хорт хавдарыг ялан дийлж, хип хоп хөгжмийг сонирхож эхэлсэн амьдралынх нь үеийн тухай өгүүлсэн “Маргаашгүй” УСК-д Rokitbay Тулгатын дүрд тоглож байсан төдийгүй В.Тулгат өөрөө туслах дүр бүтээсэн.

Түүний оролцож буй America’s Next Top Hitmaker тэмцээний ялагч 50,000$-ын шагнал, Global Citizen Festival тоглолтонд оролцоод зогсохгүй Rolling Stone сэтгүүлд өөрийн түүхээ нийтлүүлэх юм. Албан ёсны санал хураалт нь 5-р сарын 27-нд эхлэх юм байна.