Өнгөрсөн 4 дүгээр сарын дундуур Японы Нара хотын Тэнри Санкоокан музей 5.6 метрийн диаметртэй дугуй хэлбэрийн даавуун дээр бичигдсэн Чингис хааны үр удам болох Сэцэн хан Шолойн дөрвөн үеийн 12 мянган хүний нэрс бүхий бичгийг дэлгэн толилуулсан нь олон нийтийн анхаарлыг ихээхэн татсан билээ. Энэ нь Монгол Улсад гурван ширхэг байгаа дурсгал бөгөөд хоёр нь Үндэсний номын санд, нөгөө нь Үндэсний төв архивд хадгалагддаг юм.

Эл дурсгалыг Үндэсний бичиг үсгийн баярын нээлтийн ёслолын үеэр богино хугацаанд олон нийтэд дэлгэн толилуулж, ШУГЗ, доктор, профессор Б.Сумьяабаатар "Японд олдсон угийн бичгийг Монголынхтой зэрэгцүүлэн судалсан нь“ сэдвээр илтгэл тавина. Энэ үйл ажиллагаа 2025 оны 5 дугаар сарын 04-ний Үндэсний бичиг үсгийн баярын өдрийн 13:00-14:30 цагийн хооронд болно гэж Монгол Улсын Үндэсний Номын Сангаас мэдээллээ.