Поп дива наймдугаар сарын 23-нд Төв цэнгэлдэх хүрээлэнд урлагийн ертөнцийн 40 жилээ тайлагнана. Энэ нь түүний Төв цэнгэлдэхэд хийж буй гурав дахь тоглолт юм. 

Т.Ариунаа тоглолтдоо зориулсан хэвлэлийн хурлын үеэр "Намайг энэ хүртэл үгээр далавч хийж, аялгуугаар дэвэн хөөрч, өндрийн өндөрт нисгэж сонсогч олонд хүргэсэн илч, түлш бол үг зохиогч, ая зохиогч, хөгжмийн найруулагч, продюсер, бүжигчид, дуучид, тоглолтын найруулагчид, загвар зохион бүтээгч, нүүр будагч гээд он жилүүдийн туршид, цаг, үе болгонд сонгогдож ажилладаг уран бүтээлчид та нар билээ. Аль нэг нь үгүй бол угаас бүтээл төрөх ч боломжгүй. Тиймээс та нартаа би баярлаж буйгаа хэлэхийг хүсэж байна" гэв. 

Поп хатагтайн урлагийн ертөнцөөр замнасан 40 жилийн түүхийг өгүүлэх тоглолтын нэр "Зүрх асна".