2025 оны гуравдугаар сарын 31-ний 22:35 цагт Иргэний хэргийн анхан шатны шүүхээс Мэдээллийн Технологийн Үндэсний Парк болон Өргөө-2 кино театрын хооронд үүссэн өмчлөлийн маргааныг МТҮП-ийн талд шийдвэрлэсэн болохыг албан ёсоор мэдэгдэж байна.

Шүүхийн шийдвэрийн дагуу МТҮП нь өмчлөлийн байрныхаа хууль ёсны эзэмшлийг буцаан авах эрхтэй бөгөөд Өргөө-2 кино театрыг албадан чөлөөлөх шийдвэр гаргасан болно. Уг шийдвэр нь 14 хоногийн дараа бичгээр баталгаажих бөгөөд энэ хугацааны дараа хариуцагч тал давж заалдах эсэх нь тодорхой болох юм. МТҮП нь Монгол Улсын мэдээллийн технологийн салбарын хөгжилд чухал үүрэг гүйцэтгэж, инноваци, дэвшлийг дэмжих эрхэм зорилготой байгууллага билээ. Энэ ялалт нь зөвхөн бидний хувьд бус, Монголын мэдээллийн технологийн салбарын ирээдүйн хөгжилд чухал ач холбогдолтой шийдвэр боллоо. Бидний эрх зүйн тэмцлийг тууштай дэмжсэн нийт хамт олон, хуульчид, эрх зүйн байгууллагууд болон мэдээллийн технологийн салбарын бүхий л оролцогч талуудад гүн талархал илэрхийлье. Энэхүү шийдвэрийн дагуу бид цаашид салбарынхаа хөгжил, дэвшилд хувь нэмрээ оруулахын төлөө үргэлжлүүлэн ажиллах болно гэж МТҮП-ын захирал Ж.Золзаяа мэдээллээ. 
-