Засгийн газрын хуралдаанаар хэлэлцэн шийдвэрлэсэн асуудлын талаар Сангийн сайд Б.Жавхлан мэдээлэл хийлээ. Тэрээр "Өнөөдрийн Засгийн газрын хуралдаанаар түүхэн гэж нэрлэж болох тогтоол батлагдлаа. Засгийн газрын хуралдаанаар өнөөдөр баталсан тогтоолоор Монголын ард түмэн баялагтаа эзэн болох боломж бүрдэж байна. Саяхан УИХ-ын баталсан Баялгийн сангийн тухай хуулийг хэрэгжүүлэх зарим арга хэмжээний тухай тогтоолыг баталлаа. Үндэсний баялгийн сан гурван сангаас бүрдэж байгаа. Ирээдүйн өв сан, Хуримтлалын сан, Хөгжлийн сан гэсэн гурван сан. Ирээдүйн өв санд ирээдүй хойч өвлүүлэх хөрөнгийг хуримтлуулж, арвижуулна. Хуримтлалын санд одоо цаг үедээ зарцуулах хөрөнгийг хуримтлуулна. Энэ сангийн хөрөнгийг боловсрол, эрүүл мэнд, орон сууц гэсэн гурван чиглэлд зарцуулна. Хөгжлийн сангийн хөрөнгийг томоохон төсөл, хөтөлбөрүүдийг зарцуулна. Төсөв ашигтай гарвал Тогтворжуулалтын сангийн хөрөнгийн 50 хувийг Хөгжлийн санд оруулна.

Өнөөдөр Хуримтлалын сангийн хөрөнгөтэй холбоотой шийдвэр гаргасан. Энэ санд хөрөнгө төвлөрүүлэх үүрэгтэй "Эрдэнэс Монгол” компанид байгаа 500 тэрбум төгрөгийн хөрөнгийг орон сууцны ипотект шилжүүлэх шийдвэрийг Засгийн газрын өнөөдрийн хуралдаанаас гаргалаа. Монгол Улс ипотекийн зээлд хамгийн ихдээ жилд 700 тэрбумыг гаргаж байсан. Харин одоо Хуримтлалын сангаас 500 тэрбум төгрөгийг ипотекийн зээлд гаргаснаар ипотекийн зээлийн эх үүсвэр 1.2 их наяд төгрөг болно. Арилжааны банкнууд 200 тэрбум төгрөгийг өөрийн эх үүсвэрээс гаргах бол Монголбанк 500 тэрбум, Хуримтлалын сангаас 500 тэрбум төгрөг гарч байгаа юм.

Банкнуудаас судалгаа авахад 17 мянган иргэн ипотекийн зээлийн хүсэлт өгсөн нь судлагдаж байна. Ипотекийн зээлийн санхүүжилтэд 1.2 их наяд төгрөг гаргах учраас банкны шалгуураа хангасан 10 мянга гаруй иргэн орон сууцтай болох боломжтой болж байна. Ирэх даваа гаригаас Монголбанкин дээр эхний гүйлгээ хийгдэнэ. Монголбанк удирдаад банкнууддаа хуваарилалтаа хийгээд явна" гэв.