Олон улсын Улаан загалмай, Улаан хавирган сар нийгэмлэгүүдийн холбооноос газар хөдлөлтөд өртсөн Мьянмарын ард иргэдэд туслах олон улсын уриалгыг гаргаад байна. Уг уриалгыг дэмжин Монголын улаан загалмай нийгэмлэгээс Мьянмарын ард иргэдэд туслах Хандивын аянг эхлүүлж, аж ахуйн нэгж байгууллага, иргэдийг хүмүүнлэгийн үйлсэд нэгдэн хамтран ажиллахыг уриаллаа. Уг хандивыг МУЗН-ийн дансаар хүлээн авах аж. 

Мьянмарын төв хэсэгт 2025 оны гуравдугаар сарын 28-ны өдөр 7.7 магнитудын хүчтэй газар хөдөлсөн нь хөрш зэргэлдээ орнуудад хүртэл мэдрэгдэж, их хэмжээний хохирол учруулж, 1700 гаруй хүн нас барж, 3400 орчим хүн шархадсан. Тус цэргийн удирдагчид гадны улсын оролцоонд дургүй ч энэ удаад олон улсаас тусламж хүссэн билээ.