Өнөөдрийн /2025.05.19/ байдлаар улаанбурхан өвчин туссан нь лабораториор батлагдсан 2296, эмнэлэгт хэвтэн эмчлүүлж байгаа 371, гэрээр эмчлүүлж буй 369, эдгэрсэн 1556, хавьтал 33.237, нас барсан 1 хүн байна. Уг өвчин томуугийн вирустэй хавсарвал нэн хүнд явцтай болохыг эмч нар анхааруулаад байгаа юм. 

Өдөр ирэх бүр халдвар ихээр бүртгэгдэж байгаатай холбоотойгоор эрүүл мэндийн байгууллагууд иргэдийг тус өвчнөөс сэргийлэх, маск зүүж, ариутгал хийхийг уриалж байна. Гэтэл дийлэнх иргэд Улаанбурхан өвчний нэрийг байнга шахуу сонсдог ч тухайн өвчнийг ямар өндөр эрсдэлтэй талаар иргэд төдийлөн мэддэггүй. Тэгвэл улаанбурхан өвчний шинж тэмдэг, халдвар хэрхэн дамждаг, мөн урьдчилан сэргийлэх аргын талаар мэдээллийг хүргэж байна. 

ДЭМБ-ын албан ёсны сайтаас харвал улаанбурхан нь вирусээр үүсгэгддэг амархан халдварладаг өвчин юм. Халдвартай хүн амьсгалах, ханиах, найтаах үед бусад хүмүүст халдварлана. Тус өвчнийг Морбилливирус хоминис нэртэй вирус үүсгэдэг байна. Улаанбурхан нь амьсгалын замаар халдварлаж, дараа нь бүх биед тархдаг. Уг өвчин халдварлах чадвар өндөр учир халдвартай хүнтэй нэг өрөөнд байхад л халдвар авч болзошгүй. Халдвартай хүн өрөөнөөс гараад хоёр цаг өнгөрөх хүртэл халдвар авах магадлалтай юм.

Өвчний шинж тэмдэг

АНУ-ын Өвчний хяналт, урьдчилан сэргийлэх төвийн (CDC) сайтаас харвал.Халдвар авснаас 7-14 хоногийн дараа шинж тэмдэг эхэлнэ. Улаанбурхан өвчний анхан шатны шинэ тэмдгүүдэд:

• Өндөр халуурах
• Ханиалгах
• Нус гоожих
• Нүд улайх

Шинж тэмдэг эхэлснээс 2-3 хоногийн дараа амны хөндийд жижиг цагаан толбонууд  (Копликийн толбо) гарч магадгүй.

Шинж тэмдэг эхэлснээс 3-5 хоногийн дараа нүүрэн дээр улаан тууралт гардаг. Тууралт доошлон хүзүү, их бие, гар, хөл рүү тархдаг юм. Улаан тууралт дээр жижиг хэмжээтэй овойсон гүвдрүү гарч болдог. Тууралт гарч эхлэхэд халдварласан хүний халуун нэмэгдэх магадлалтай.

Халдвар хэрхэн дамждаг вэ

Улаанбурханаар өвчлөөд эдгэсэн хэдий ч вакцин тариулах насанд хүрээгүй нялх хүүхэдтэй айлуудаар хэсэхгүй байхыг зөвлөж байна.

Вирус нь амьсгалын замаар халдварлахаас гадна халдвартай гараар нүдээ нухахад хүртэл халдварлана. Вирус амьсгалын дээд замаас ярих, ханиах, найтаах үед гадаад орчинд цацагдаж халдварыг тараана. Халдварлалтын индекс хамгийн өндөр буюу 100 хувь. Жилийн улирал хамаарахгүйгээр дэгдэж тархаж өвчлүүлнэ.

Ихсээр халдвар орсон бол улаануудын ижил ургийн гажиг үүсгэх магадлалтай.

Хүндрэл

Улаанбурхан өвчний үед үүсдэг түгээмэл хүндрэл нь чихний халдвар, гүйлгэх юм. “CDC”-ийн сайтаас харвал улаанбурхан туссан арван хүүхэд тутмын нэгд нь чихний халдвар үүсдэг байна. Харин улаанбурхнаар өвчилсөн арван хүн тутмын нэг орчимд нь гүйлгэх шинж тэмдэг илэрдэг. Өвчин даамжирсны улмаас хатгаа, энцефалит (тархи үрэвсэн хавагнах) үүсэж, үхэлд хүргэх эрсдэлтэй.

Эрсдэлт бүлэг

Улаанбурхны халдвар нь ямар ч насны хүн авсан ноцтой өвчлөл үүсгэх боломжтой. Гэсэн хэдий ч улаанбурхнаар халдварлахад зарим хүмүүс хүндрэл үзүүлэх магадлал илүү өндөр. Эрсдэлт бүлгийн хүн бол:

Таваас доош насны хүүхдүүд

20-иос дээш насны хүмүүс

Жирэмсэн эмэгтэйчүүд

Цусны хорт хавдар, ХДХВ-ийн халдвартай гэх мэт дархлааны сулралтай хүмүүс.