АНУ-ын Батлан хамгаалах яам буюу Пентогоноос нууцын зэрэглэлтэй баримт алдагдан олон нийтэд ил болсон талаар хэвлэлүүд мэдээлсэн. Тэгвэл уг баримтууд доторх мэдээллүүд эхнээсээ ил болж эхэлжээ. Британийн ВВС агентлагийн мэдээлснээр, уг баримтууд дотор АНУ нь эртний түнш БНСУ-ыг маш ихээр хардаж сэрдэн онцгой анхаарал тавьж тагнадаг болохыг илчилсэн баримтууд байсан гэнэ. Мөн ОХУ, Украинтай ч холбоотой баримт мэдээллүүд бий аж.

Үүнээс БНСУ-тай холбоотой баримтын агуулгыг тодруулбал, Вашингтон анхнаасаа БНСУ-ыг Украинд зэвсэг өг хэмээн шахаж байсан бөгөөд Сөүл “Дайтаж байгаа улсуудын алинд нь ч зэвсэг нийлүүлэхгүй” хэмээн татгалзсаар өдийг хүрчээ. Болохгүй болохоор нь манайд нийлүүл хэмээн ятгаж зөвшөөрүүлсэн аж. Тодруулбал, АНУ Украинд зэвсэг нийлүүлээд БНСУ-аас нөхөж авах тохироо хийсэн байна.

Мөн БНСУ-ын Ерөнхийлөгчийн зөвлөх нарын хооронд өнгөрсөн сарын 1-нд болсон яриаг хүртэл олж авсан байжээ.