ОХУ, Украины төлөөлөгчдийн уулзалт хэлэлцээрийн хоёрдугаар шат  өнөөдөр Беларусийн Беловежийн шугуйд болно. Энэ удаагийн хэлэлцээрээр хоёр тал Украин руу хүмүүнлэгийн хонгил гаргаж өгөх зэрэг асуудлыг хэлэлцэнэ гэж байгаа ч сүүлд ирсэн мэдээллээр гал зогсоох асуудлыг бас хөндөх бололтой. Хойд хөршийн хэвлэлүүд ингэж мэдээлж байна. Украины Ерөнхийлөгч В.Зелинский өчигдөр “Оросууд гал зогсоох хэлэлцээр хийе гэж л байгаа бол эхлээд өөрсдөө галаа зогсоох ёстой” гэж байсан юм.

Төлөөлөгчдийн бүрэлдэхүүнд өөрчлөлт ороогүй, өмнөх хэлэлцээрийн баг уулзалдах гэнэ.  

Эхний уулзалтад ОХУ-ын төлөөлөгчдийг Ерөнхийлөгчийн туслах, өмнө нь Соёлын сайд байсан Владимир Мединский ахалж, Гадаад харилцааны дэд сайд Андрей Руденко, ОХУ-аас Беларусьт суух Элчин сайд Борис Грызлов, Төрийн Дум дахь Олон улсын асуудал эрхэлсэн хорооны дарга Леонид Слуцкий, Батлан хамгаалахын дэд сайд Александр Фомин нар багтсан байна. Харин Украиныг Батлан хамгаалахын сайд Алексей Резников ахалж, Дээд Рад дахь “Ард түмний зарц” фракцийн дарга Давид Арахамия, Ерөнхийлөгчийн Тамгын газрын даргын зөвлөх Михайл Подоляк нар төлөөлж байсан юм.