Улсын хэмжээнд томуу, томуу төст өвчин болон амьсгалын замын цочмог хүнд халдвар алаг цоог дэгдэлтийн түвшинд байгааг мэргэжлийн байгууллагаас мэдээллээ.

Ерөнхий боловсролын болон мэргэжил, техникийн боловсрол, их, дээд боловсролын сургалтын байгууллагуудын хичээл сургалтын үйл ажиллагаа эхэлж байгаатай холбогдуулж УОК, Шуурхай штабын хуралдаанаас өгсөн үүрэг чиглэлийн дагуу Эрүүл мэндийн яам, Боловсролын яамны Төрийн нарийн бичгийн дарга нар хамтарсан уулзалт зохион байгуулж, авч хэрэгжүүлэх хариу арга хэмжээний талаар ярилцлаа. 

Энэ үеэр ЭМЯ-аас "Оюутан, суралцагчдын амралтын үеэр томуу, томуу төст өвчин болон амьсгалын замын цочмог хүнд халдварын тохиолдол 50 хувиар буурсан учраас хичээллэх хэлбэр, суралцагчдын амралтын хуваарьт өөрчлөх шаардлагагүй. Харин хичээл, сургалтын үйл ажиллагаа эхлэхээр дэгдэлт нэмэгдэх тул хариу арга хэмжээ авахад талууд анхаарч, төлөвлөгөө гарган, зөвлөгөө мэдээллийг эрчимжүүлнэ" гэлээ. Мөн амны хаалт хэрэглэхийг бүх түвшний боловсролын сургалтын байгууллагын багш, суралцагч, ажилтан, албан хаагчдад чиглэл болгож, дагаж ажиллахыг зөвлөлөө.