Үертэй байгаа байршлуудын нөхцөл байдлын талаар НЗДТГ-ын хэвлэлийн хэлтсээс өнөөдөр мэдээлэл өглөө.

"Баянгол, Хан-Уул дүүргийн нутаг дэвсгэр буюу Алтай хотхоны даланг сэтэлснээр үерийн ус доошилж байна. Тэлмэн хотхоны хойд тал Алтай хотхон руу ордог гүүрний орчмын усны түвшин буурчээ.

Туул голын үерийн халилтаас сэргийлж Зүүн уулын сувагт хаалт хийж, хамгаалалтын далан босгох ажил үргэлжилж байна. Голын усны түвшин хэвийн, нэмэгдээгүй.

Өчигдөр орой Тэрэлж голын усны түвшин 282 см хүрч байсан бол өглөө 06:00 цагт 254 см болж буурсан мэдээлэл ирлээ.

Зуслангийн бүсэд усны түвшин нэмэгдээгүй байна.

Хан-Уул, Сонгинохайрхан, Сүхбаатар, Баянзүрх, Баянгол, Чингэлтэй дүүргийн 18 байршилд Нийслэл, дүүргийн Гамшгаас хамгаалах алба, Мэргэжлийн анги, нутгийн захиргаа, төрийн цэргийн болон тусгайлсан чиг үүргийн байгууллагын 4,828 ажилтан, алба хаагч 403 техниктэй үүрэг гүйцэтгэн ажиллаж байна.

ТҮК-ийн албан хаагчид урд шөнө 02:40 цагаас цэвэрлэгээний ажлаа эхэлсэн" гэв.

Өнөөдөр өглөө Нийтийн Тээврийн Үйлчилгээний 117 чиглэлээс 105 чиглэлийн 811 тээврийн хэрэгсэл хэвийн ажиллаж , Авто зам, замын байгууламж хаагдсантай холбогдуулан зохицуулалтаар 12 чиглэлийн 104 тээврийн хэрэгслийн чиглэлд өөрчлөлт оруулжээ.