Гудамж, зам, талбайн тохижилт, амьдрах орчны нөхцөлийг сайжруулах чанаржуулах, ногоон байгууламж, цэцэрлэгжүүлэлтийг нэмэгдүүлэх, арчлах хамгаалах, инженерийн шугам сүлжээ, дэд бүтцийг сайжруулах, аюулгүй байдлыг хангах, нийтийн эзэмшлийн эд хөрөнгийг эзэнжүүлэх, арчилж хамгаалах, хог хаягдал, орчны бохирдлыг бууруулах, иргэд, аж ахуйн нэгж, байгууллагуудад мэдээлэл, сурталчилгааг хүргэх, тэдгээрийн оролцоог нэмэгдүүлэх зорилготой "Манай хороо-Миний гудамж" аяныг НЗДТГ-аас санаачлан зохион байгуулж байна.

Аянд төрийн болон хувийн хэвшлийн аж ахуйн нэгж, байгууллага, СӨХ, айл өрхүүд хамрагдах боломжтой бөгөөд оролцогчид материалаа 2023.09.10-ны дотор дүүргийн ЗДТГ (Тохижилт нийтийн аж ахуйн хэлтэс)-т хүргүүлнэ. Ингэхдээ шалгуур үзүүлэлтийн дагуу хийгдсэн ажил, тохижуулсан орчны холбогдох мэдээллийг баримтжуулж ирүүлнэ хэмээн УБЗАА-наас мэдээлэв.

Шилдэг дүүрэг, хороо /орон сууц/, хороо /гэр хороолол/, аж ахуйн нэгж, байгууллага, СӨХ, орон сууцны контор (төсөвт ба хувийн ОСК), Хэрэглэгчдэд үйлчлэх төв, өрх /гэр хороолол/, хог хаягдлын үйлчилгээний байгууллага, ногоон байгууламжийн шилдэг аж ахуйн нэгж байгууллагыг шалгаруулах аж.

Нийслэлийн 384 жилийн ойн баярын өдрийг тэмдэглэн өнгөрүүлэх арга хэмжээний хөтөлбөрийн хүрээнд зохион байгуулж, шагнал, батламжийг гардуулна. Шилдэг оролцогчдыг урамшуулж, гадаад улсад туршлага судлах аяллыг зохион байгуулах юм байна.

Эх сурвалж: Улаанбаатар хотын Захирагчийн ажлын алба